05 April 2025


සාර්ථකම නායකයා රෝහිත්ද? දෝනිද?



ඉන්දීය එක්දින කණ්ඩායමේ වත්මන් නායක රෝහිත් ශර්මා මේ වන විට ICC තරගාවලි ඇතුළුව විවිධ තරගාවලිවලදී නායකයා ලෙස කුසලාන 10ක් ලබාගෙන තිබෙනවා.

මහේන්ද්‍ර සිං දෝනි නායකයෙක් ලෙස දැක්වූ දස්කම්වලට බොහෝ දුරට සමාන ලෙස රෝහිත් එහිදී දස්කම් දක්වා තිබීම විශේෂත්වයක්.

ඒ අනුව T20 ලෝක කුසලානයක් ඉන්දියාවට ලබාදීමට දෝනි මෙන්ම රෝහිත්ද පසුගිය වසරේදී කටයුතු කළා.

එමෙන්ම ශූරයන්ගේ කුසලානයක් ලබා ගැනීමට දෝනිගේ නායකත්වයෙන් යුත් ඉන්දීය කණ්ඩායම 2013 වසරේ මෙන්ම රෝහිත්ගේ නායකත්වය යටතේ ඊයේ (09) ඉන්දියාව ශූරයන්ගේ කුසලානයක් ලබා ගත්තා.

ඉන්දියන් ප්‍රිමියර් ලීග් තරගාවලි ඉතිහාසයේදී මෙම ක්‍රීඩකයන් දෙදෙනාම නායකයා ලෙස කටයුතු කරමින් සිය කණ්ඩායමට 5වතාව බැගින් IPL ශූරතාව හිමිකර දී තිබෙනවා.

මේ අතර ආසියානු කුසලාන 2 බැගින් මෙම ක්‍රීඩකයන් දෙදෙනා ඔවුන්ගේ නායකත්වය යටතේ ඉන්දීය කණ්ඩායමට හිමි  
කරදුන්නා.

දෝනිගේ නායකත්වය යටතේ එක්දින ලෝක කුසලානයක් ඉන්දීය කණ්ඩායම ජයග්‍රහණය කිරීමට 2011 වසරේදී සමත්වුණා.

කෙසේ වෙතත් රෝහිත් ශර්මාට සිය නායකත්වය යටතේ මෙතෙක් එක්දින ලෝක කුසලානයක් ඉන්දීය කණ්ඩායමට හිමි කර දීමට නොහැකි වී තිබෙනවා.

ඔවුගේ නායකත්වය යටතේ 2023 එක්දින ලෝක කුසලානයේදී ඉන්දියාව අවසන් මහා තරගය ක්‍රීඩා කළ අතර එහිදී ඕස්ට්‍රේලියාව හමුවේ ඔවුන් පරාජයට පත්වුණා.

එමෙන්ම නායකයා ලෙස දෝනි champions league T20 තරගාවලිවලදී කුසලාන 2ක් ජයග්‍රහණය කළ අතර රෝහිතට නායකයා ලෙස එහිදී ලබා ගැනීමට හැකි වුණේ එක් කුසලානයක් පමණයි.



(crictimes.lk)