නැෂනල් සුපර් ලීග් සිව්දින ක්‍රිකට් තරගාවලියේ කොළඹ කණ්ඩායමට එරෙහිව පැවති තරගය ජයග්‍රහණය කිරීමට දඹුල්ල කණ්ඩායම ඊයේ (30) සමත්වුණා.

ඒ කඩුලු 8කින්.

දඹුල්ල ජාත්‍යන්තර ක්‍රිකට් ක්‍රීඩාංගනයේ පැවති තරගයේ පළමු ඉනිම ක්‍රීඩා කළ කොළඹ කණ්ඩායම පන්දුවාර 76යි පන්දු 2ක් අවසානයේ සියලුදෙනා දැවී ලකුණු 300ක දැවැන්ත ලකුණු පුවරුවක් නිර්මාණය කළා.

එහිදී කුසල් මෙන්ඩිස් 119ක්, ලහිරු මධුසංඛ සහ චරිත් අසලාංක ලකුණු 43 බැගින් රැස් කිරීමට සමත්වුණා.

දඹුල්ල කණ්ඩායම වෙනුවෙන් පන්දු යැවීමේදී අකිල ධනංජය සහ දුලාජ් සමුදිත කඩුලු 3 බැගින් බිඳ දැමුවා.

අනතුරුව සිය පළමු ඉනිම ක්‍රීඩා කළ දඹුල්ල කණ්ඩායම සියලුදෙනා දැවී ලකුණු 400ක් රැස් කළා.

කෙසේ වෙතත් කොළඹ කණ්ඩායමට සිය දෙවන ඉනිමේදී රැස් කර ගැනීමට හැකි වුණේ ලකුණු 232ක් පමණයි.

ඒ අනුව මෙම තරගය ජයග්‍රහණය කිරීම වෙනුවෙන් දඹුල්ල කණ්ඩායමට හිමිවූ ඉලක්කය ලකුණු 133ක්.

එම ඉලක්කය හඹා ගිය දඹුල්ල කණ්ඩායම කඩුලු 2ක් පමණක් දැවී සිටියදී ජයග්‍රාහී ඉලක්කය පසුකළා.