සංචාරක ශ්‍රී ලංකා කණ්ඩායම සහ නවසීලන්ත කණ්ඩායම අතර පැවැත්වෙන තරග 3කින් සමන්විත එක්දින තරගාවලිය හෙට ආරම්භ වනවා.

ඒ අනුව එහි පළමු තරගය නවසීලන්තයේ වෙලින්ටන් නගරයේ පිහිටි බේසින් රිසව් ක්‍රිකට් ක්‍රීඩාංගණයේදී හෙට (05) පෙරවරු 3.30ට ආරම්භ වීමට නියමිතයි.

ශ්‍රී ලංකාව සහ නවසීලන්තය අතර මේ වන විට එක්දින තරග 105ක් පවත්වා තිබෙනවා.

ඉන් තරග 52ක් නවසීලන්ත කණ්ඩායම ජයග්‍රහණය කර ඇති අතර ශ්‍රී ලංකා කණ්ඩායමට ජයග්‍රහණය කිරීමට හැකියාව ලැබී ඇත්තේ තරග 43ක් පමණයි.

එමෙන්ම දෙරට අතර පැවති එක්දින තරග 10ක් ජය පරාජයෙන් තොරව අවසන් වී තිබෙනවා.

ශ්‍රී ලංකා කණ්ඩායම සහ නවසීලන්ත කණ්ඩායම අතර ද්විපාර්ශික එක්දින තරගාවලි 18ක් පවත්වා ඇති අතර ඉන් තරගාවලි 10කම ජය හිමි කරගෙන ඇත්තේ නවසීලන්ත කණ්ඩායමයි.

නවසීලන්තයට එරෙහිව ශ්‍රී ලංකා කණ්ඩායමට ජයග්‍රහණය කිරීමට හැකියාව ලැබී ඇත්තේ එක්දින තරගාවලි 4ක් පමණයි.

එමෙන්ම තවත් තරගාවලි 4ක් ජය පරාජයෙන් තොරව අවසන් වී තිබෙනවා.

ශ්‍රී ලංකා කණ්ඩායමට එරෙහිව නවසීලන්ත කණ්ඩායම එක්දින තරගයක රැස් කළ වැඩිම ලකුණු 371ක්.

ඒ 2019 වසරේදීයි.

එහිදී ඔවුන් කඩුලු 7ක් දැවී එම ලකුණු සංඛ්‍යාව ලබා ගැනීමට සමත්වුණා.

Mount Maunganui ක්‍රීඩාංගනයේ පැවති එම තරගයේදී දෙවන ඉනිම ක්‍රීඩා කළ ශ්‍රී ලංකා කණ්ඩායම සියලුදෙනා දැවී ලකුණු 326ක් රැස් කළා.

එම තරගයෙන් ශ්‍රී ලංකාව පරාජයට පත් වුවද ඔවුන් රැස් කළ ලකුණු සංඛ්‍යාව වාර්තා වන්නේ නවසීලන්ත කණ්ඩායමට එරෙහිව ශ්‍රී ලංකා කණ්ඩායම එක්දින තරගයකදී ලබා ගත් ඉහළම ලකුණු සංඛ්‍යාව ලෙසයි.

ශ්‍රී ලංකාවට එරෙහිව නවසීලන්තය එක්දින තරගයකදී ලබාගෙන ඇති අඩුම ලකුණු සංඛ්‍යාව ලකුණු 73ක්.

ඒ  2007 වසැරේ Auckland ක්‍රීඩාංගනයේ පැවති තරගයකදීයි.

එම තරගයේ පළමු ඉනිම ක්‍රීඩා කළ ශ්‍රී ලංකා කණ්ඩායම කඩුලු 6ක් දැවී ලකුණු 262ක් රැස් කළා.

නවසීලන්ත කණ්ඩායම හමුවේ එක්දින තරගයක ශ්‍රී ලංකාව ලබාගෙන ඇති අඩුම ලකුණු සංඛ්‍යාව දැක්වෙන්නේ ලකුණු 76ක් ලෙසයි.

2023 වසරේ Auckland ක්‍රීඩාංගනයේ පැවති එම තරගයේ පළමු ඉනිම ක්‍රීඩා කළ නවසීලන්තය ලකුණු 274ක් රැස් කළා.

හෙට තරගය පැවැත්වෙන බේසින් රිසව් ක්‍රිකට් ක්‍රීඩාංගණයේ පළමු එක්දින තරගය පවත්වා තිබෙන්නේ නවසීලන්තය සහ එංගලන්තය අතරයි.

ඒ 1975 වසරේදීයි.

ශ්‍රී ලංකා කණ්ඩායම එක්දින තරග 2කට පමණක් මෙම ක්‍රීඩාංගනයේදී ක්‍රීඩා කර තිබෙනවා.

ඒ 1992 වසරේදී සහ 1997 වසරේදීයි.

1992 වසරේදී එම ක්‍රීඩාංගනයේ දකුණු අප්‍රිකාව සමඟ පැවති  තරගය කඩුලු 3කින් ජය ගැනීමට ශ්‍රී ලංකාව සමත්වුණා.

ශ්‍රී ලංකාව බේසින් රිසව් ක්‍රිකට් ක්‍රීඩාංගණයේ ක්‍රීඩා කළ අවසන් තරගය 1997 වසරේදී පැවැත්වුණා.

ඒ නවසීලන්තයට එරෙහිවයි.

එම තරගය ලකුණු 69කින් ජයග්‍රහණය කිරීමට නවසීලන්ත කණ්ඩායම සමත්වුණා.

ඒ අනුව ශ්‍රී ලංකා කණ්ඩායම බේසින් රිසව් ක්‍රිකට් ක්‍රීඩාංගණයේ එක්දින තරගයටකට ක්‍රීඩා කරන්නේ වසර 28කට පසුව වීම විශේෂත්වයක්.

මේ ක්‍රීඩාංගනයේ මේ දක්වා එක්දින තරග 30ක් පවත්වා තිබෙනවා.

ඉන් තරග 16ක ජය හිමි කරගෙන තිබෙන්නේ පළමුව පන්දුවට පහර දුන් කණ්ඩායමයි.

මෙම ක්‍රීඩාංගනයේ දෙවනුව පන්දුවට පහර දුන් කණ්ඩායමට ඉන් ජයග්‍රහණය කිරීමට හැකියාව ලැබී තිබෙන්නේ තරග 11ක් පමණයි.

එමෙන්ම මෙම ක්‍රීඩාංගනයේ පැවති තරග 3ක් ජය පරාජයෙන් තොරව අවසන් වී තිබෙනවා.

ඒ අනුව මෙම ක්‍රීඩාංගනයේ ඉතිහාසය සමඟ සැසඳීමේදී හෙට තරගයේ පළමුව පන්දුවට පහර දෙන කණ්ඩායමට ජය ගැනීමට අවස්ථාව තිබෙනවා.

මෙම ක්‍රීඩාංගනයේ කණ්ඩායමක් රැස් කර ඇති ඉහළම ලකුණු සංඛ්‍යාව කඩුලු 6කට ලකුණු 318ක් වන අතර එය රැස් කර ඇත්තේ 2021 වසරේදීයි.

ඒ බංගලාදේශයට එරෙහිව නවසීලන්ත කණ්ඩායම විසින්.

මෙහිදී ශ්‍රී ලංකා කණ්ඩායමේ නායකයා ලෙස චරිත් අසලංක සහ නවසීලන්තයේ නායකයා ලෙස මිචෙල් සැට්නර් කටයුතු කරනු ලබනවා.

(crictimes.lk)