2025 ICC ශූරයින්ගේ කුසලාන එක්දින ක්‍රිකට් තරගාවලියේදී පිරිනැමීමට නියමිත ත්‍යාග මුදල් ජාත්‍යන්තර ක්‍රිකට් කවුන්සලය විසින් අද (14) නිවේදනය කළා.

ඒ අනුව එම තරගාවලියේ ශූරයින්ට ඇමෙරිකානු ඩොලර් මිලියන 2.24 (රුපියල් කෝටි 65ක් පමණ) මුදලක් පිරිනැමීමට නියමිත බවයි වාර්තා වන්නේ.

එමෙන්ම අනුශූරතාවය දිනා ගන්නා කණ්ඩායම වෙනුවෙන් ඇමෙරිකානු ඩොලර් මිලියන 1.12ක (රුපියල් කෝටි 32ක පමණ) මුදලක් වෙන්කර තිබෙනවා.

ජාත්‍යන්තර ක්‍රිකට් කවුන්සිලය සඳහන් කළේ අවසන් පූර්ව තරග පරාජයට පත්වන රටවල් දෙක සඳහා ඩොලර් 560,000 බැගින් (රුපියල් කෝටි 16 බැගින්) හිමිවන බවයි.

ඒ අනුව මෙවර තරගාවලිය වෙනුවෙන් සමස්ත ත්‍යාග මුදල ලෙස ICCය ඩොලර් මිලියන 6.9ක (රුපියල් කෝටි 203ක්) වෙන්කර තිබෙනවා.

පසුගිය 2017 ශූරයින්ගේ කුසලාන තරගාවලියට සාපේක්ෂව එය 53%ක ඉහළ නැංවීමක් බවයි වාර්තා වන්නේ.

තරගාවලියේ මූලික වටයේදී කණ්ඩායමක් ලබන සෑම ජයග්‍රහණයක් වෙනුවෙන්ම ඩොලර් 34,000ක (රුපියල් කෝටියක්) මුදලක් හිමි වනවා.

එමෙන්ම 5වන සහ 6වන ස්ථානවලින් තරගාවලිය අවසන් කරන රටවල් දෙකට ඩොලර් 350,000 බැගින්ද 7වන සහ 8වන ස්ථාන හිමි කර ගන්නා රටවල් දෙකට ඩොලර් 140,000 බැගින් ලබාදීමට නියමිතයි.

මීට අමතරව තරගාවලියට ක්‍රීඩා කරන සෑම කණ්ඩායමකටම ඩොලර් 125,000 බැගින් වෙන් කර තිබෙනවා.

මෙවර ශූරයන්ගේ කුසලාන තරගාවලිය පැවැත්වෙන්නේ 2017 වසරෙන් පසුවයි.

එය පෙබරවාරි 19වනදා සිට මාර්තු 09වනදා දක්වා පාකිස්ථානයේ සහ ඩුබායිහීදී පැවැත්වෙනවා.