2025 ශූරයන්ගේ කුසලාන ක්‍රිකට් තරගාවලියේ ඇෆ්ගනිස්ථානය සහ ඕස්ට්‍රේලියාව අතර ඊයේ (28) පැවති තරගය අතහැර දැමීමට සිදුවුණා.

ඒ තරගයට අඛණ්ඩව වර්ෂාවෙන් බාධා එල්ල වීමත් සමඟයි.

මේ සමඟ තරගාවලියේ අවසන් පූර්ව වටයට සුදුසුකම් ලබා ගැනීමට ඕස්ට්‍රේලියා කණ්ඩායම සමත්වුණා.

ඒ ප්‍රසාද ලකුණු 4ක් ලබා ගනිමින්.

ඊයේ පැවති තරගය ඇෆ්ගනිස්ථාන කණ්ඩායම ජයග්‍රහණය කළේ නම් ඔවුන්ට අවසන් පූර්ව වටයට සුදුසුකම් ලැබීමට අවස්ථාව තිබුණා.

කෙසේ වෙතත් තරගය අතහැර දැමීම හේතුවෙන් ඇෆ්ගනිස්ථාන කණ්ඩායමට අවසන් පූර්ව වටයට සුදුසුකම් ලැබීමට තිබූ අවස්ථාව අවම වී තිබෙනවා.

ඔවුන්ට අවසන් පූර්ව වටයට සුදුසුකම් ලබා ගැනීමට නම් දකුණු අප්‍රිකා කණ්ඩායමට එරෙහිව අද (01) පැවැත්වෙන තරගයෙන් එංගලන්ත කණ්ඩායම දැවැන්ත ජයග්‍රහණයක් වාර්තා කළ යුතුයි.

ඒ දකුණු අප්‍රිකා කණ්ඩායම ප්‍රසාද ලකුණු 3ක් සහ NRR 2.140ක පැවතීම හේතුවෙන්.

ඇෆ්ගනිස්ථාන කණ්ඩායම මේ වන විට ප්‍රසාද ලකුණු 3ක් සහ NRR -0.990ක් ලබාගෙන තිබෙනවා.