සත්කාරක නවසීලන්ත කණ්ඩායමට එරෙහිව පැවති අවසන් එක්දින තරගය ලකුණු 140කින් ජයග්‍රහණය කිරීමට ශ්‍රී ලංකා කණ්ඩායම අද (11) සමත්වුණා.

නවසීලන්තයේ Aucklandහී Eden Park ක්‍රිකට් ක්‍රීඩාංගණයේ පැවති තරගයේ කාසියේ වාසිය ජයග්‍රහණය කළ ශ්‍රී ලංකාව පළමුව පන්දුවට පහරදීමට තීරණය කළා.

ඒ අනුව තරගයේ පළමු ඉනිම ක්‍රීඩා කළ ශ්‍රී ලංකා කණ්ඩායම නියමිත පන්දුවාර 50 අවසානයේ කඩුලු 8ක් දැවී ලකුණු 290ක් රැස්කර ගැනීමට සමත්වුණා.

එහිදී පැතුම් නිස්සංක, කුසල් මෙන්ඩිස් සහ ජනිත් ලියනගේ අර්ධ ශතක රැස් කළා.

ඒ අනුව මෙම තරගය ජයග්‍රහණය කිරීම සඳහා ලකුණු 291ක ඉලක්කයක් හඹා ගිය නවසීලන්තයට පන්දුවාර 29යි පන්දු 04ක් අවසානයේ සියලුදෙනා දැවී රැස්කර ගැනීමට හැකි වුණේ ලකුණු 150ක් පමණයි.

කෙසේවෙතත් දෙරට අතර පැවති එක්දින තරගාවලියේ ජය තරග 2 - 1ක් ලෙස නවසීලන්තය හිමි කරගත්තා.

(crictimes.lk)